Foreldur hava ein týdningarmiklan leiklut í ítróttinum.
Vegleiðing til foreldur
Øll børn og ung hava rætt til at gera ítrótt í einum góðum umhvørvi.
Foreldur hava ein týdningarmiklan leiklut í ítróttinum. Tað er sera týdningarmikið fyri foreldur, at teirra børn eru trygg, tá ið tey gera ítrótt. Samstundis skulu tey vita, hvussu tey skulu bera seg at, tá ið okkurt er áfatt.
Tað kann til dømis vera ein venjari, sum hava ein atburð og eina venjingarmentan, ið fer um mark ella at onnur foreldur á liðnum hjá tínum barni rópa ókvæmisorð eftir mótstøðuleikarum.
Tað er týdningarmikið, at øll tekin um happing, mismun ella ágang verða tikin í álvara.
Les meira um tekin um happing og ágang í breddanum niðast.
Ger vart við tað
Varnast tú happing, mismun ella ágang, skalt tú sum foreldur gera vart við tað.
Tað kann til dømis vera, at tú sum foreldur varnast, at ein leikari á liðnum bæði verður happaður og útihýstur í felagsskapinum. Tað kann eisini verða, at tú sum foreldur ferð eftir ferð varnast undir dysti, at ein leikari als ikki sleppur inn á vøllin at royna seg.
Tann fyrsti persónurin, tú skal seta teg í samband við er venjarin. Letur tað seg ikki gera, eigur tú í øðrum lagi at seta teg í samband við felagið. Tað kann vera formannin ella forkvinnuna.
SPYR RÁÐGEVINGINA
Øll kunnu spyrja. Eingin spurningur er ov býttur at seta.
Ráðgevingin er fyri øll, ið hava samband við føroyskan ítrótt og hava tørv á at tosa við onkran.
Tað kann til dømis verða ítróttafólk, venjarar, hjálparfólk, nevndarlimir, foreldur og onnur.
Tekin um happing, mismun ella ágang
Happing: Ítróttafólkið kann verða happað á nógvar ymiskar mátar. Happingin kann vera beinleiðis og sjónlig, ella óbeinleiðis og krógvað. Til dømis er happing at spotta og háða ein annan ella at gera særandi viðmerkingar.
Talgild happing: Ítróttafólkið kann verða happað við fartelefon, interneti og kjatti. Talgilda happingin kann verða ein hóttan um at senda myndir víðari ella at vera við til at birta undir leysasøgur um ítróttafólkið.
Útihýsing: Ítróttafólkið verður tilvitað hildið uttanfyri felagsskapin, tað íðkar ítrótt í. Tað kann til dømis ikki at sleppa upp í part, tá ið ymisk tiltøk eru uttan fyri ítróttin.
Sálarligur ágangur: Ítróttafólkið kann afturvendandi og áhaldandi verð hótt, happað ella niðurgjørt.
Mismunur: Ítróttafólkið er fyri mismuni vegna uppruna, húðarliti, átrúnaði, máli, sjúku, avlami, kyni ella kynsligum samleika.
Vanrøkt: Ítróttafólkið fær ikki tann mest grundleggjandi tørvin. Tað kann vera í sambandi við reinføri, heilsu ella skúlagongd. Til dømis kemur til ítrótt í vánaligum ella sera skitnum klæðum ella klæðum, sum ikki hóska til árstíðina.
Misrøkt: Ítróttafólkið fær ikki neyðugu hvíldina, heilsubótina, matin ella vætina.
Ovvenjing: Samlaða venjingarmongdin hjá ítróttafólkinum er alt ov høg.
Fíggjarligar avmarkingar: Ítróttafólkið fær ikki virka á jøvnum føti við onnur børn, tí tað livir í fátækradømi.
Doping: Ítróttafólkið verður trýst til at brúka ólóglig evni fyri at klára seg betur í ítróttagreinini.
Kropsligur harðskapur: Tilætlaður harðskapur. Ítróttafólkið kann verða sligið, bukað, sparkað, skumpað ella pínt.
Kynslig brotsverk: Ítróttafólkið er fyri kynsligum brotsverki, tá ið tað er fyri kynsligum ágangi kynsligari misnýtslu ella kynsligari avnoyðslu.
Lokking: Ein vaksin persónur við snildum framferðarhátti uppbyggir eitt samband við ítróttafólkið, har ítróttafólkið fær álit á tí vaksna, soleiðis at tann vaksni seinni kann fremja ágang ímóti ítróttafólkinum.
