Skal eg boða frá?
Skal eg boða frá?
Ert tú stúrin um, at børn ella ung eru fyri møguligari misnýtslu, er skilagott at lesa tekstin niðanfyri. Tað er ikki neyðugt at fara gjøgnum øll stigini, um trupulleikin verður loystur á einum av fyrstu stigunum.
Um tú heldur, at eitt barn er í vanda
Tað er týdningarmikið at leggja sær í geyma, at vælferðin hjá barninum ella unga ítróttafólkinum er avgerandi. At boða frá á rætta stað og á rættan hátt hevur stóran týdning. Tað er kortini ikki tú, sum avger, um barnið ella ungi íðkarin hevur verið fyri misnýtslu ella ikki. Tað gera myndugleikarnir.
Um tú hevur tørv á stuðli ella góðum ráðum, ber til at seta seg í samband við nevndina í felagnum. Eisini ber til at venda sær beinleiðis til hesi:
- Ráðgevinga – tryggur ítróttur SPYR
- Heilsufrøðingar hjá Gigna
- Tín lækna
- Tú & Eg Ráðgevingin (Tlf: 116 111 hvørt kvøld frá kl. 20:00 – 22:00 og gerandisdagar frá kl 9:00 – 16:00)
- Løgreglan: Tlf. 114 / www.politi.fo (um tað snýr seg um kynsligan ágang, kanst tú biða um at tosa við onkran, sum arbeiðir við kynsligum brotsverkum).
- Neyðtøkutilbúgvingin: Tlf 304600 www.ls.fo
- KRIS ráðgeving fyri seksuelt misbrúkt ( tlf 448181 – tlf. 268881)
Málsviðgerð hjá Tryggum ítrótti
Ráðgevin í tryggum ítrótti vísir til tær mannagongdir, ið verða nýttar hjá myndugleikunum.
Allir myndulgeikar hava ábyrgd av at fylgja mannagongdunum, tá ið ein stúran skal handfarast. Hetta tryggar, at tær liva upp til vanligu fráboðanarskylduna (tá ið vit varða av børnum og ungum).
Um tú metur at eitt barn er í vanda, skal tú ringja beinleiðis til løgregluna
Um tú ert stúrin um vælferðina hjá einum barni/ungum
Fráboða stúranina:
- Um títt felag hvørki hevur nevndarlim ella sett trivnaðarstarvsfólk, kanst tú seta seg beinleiðis í samband við barnaverndartænastur kring landið her.
- Um eingin annar er tøkur, sum kann veita tær hjálp, kanst tú seta teg í samband við løgregluna.
- Skriva tína stúran niður og lýs í stuttum, hvar og hvussu tú boðaði frá. (Eitt nú dato og tíðspunkt)
Barnavernd og fráboðanarskylda
Lógin um barnavernd sigur greitt, at vit hava øll skyldu til at boða myndugleikunum frá, um vit kenna til mál, har eitt barn er fyri umsorganarsvíki ella ágangi. Sambært lógini hava øll fráboðanarskyldu, men skilt verður tó millum vanliga borgaran og fakfólk, sum í starvi sínum hava við børn at gera. Hesin seinni bólkurin hevur herda fráboðanarskyldu, sum merkir, at ein varhugi um illgrunasom viðurskifti er nóg mikið til, at boðast skal frá.
Les um fráboðanarskyldu í lóg um barnavernd.
Torført kann vera at vita við vissu, nær eitt barn er fyri vansorgan ella ágangi, men sum borgari hevur tú skyldu til at gera vart við, um tú hevur kunnleika til slík viðurskifti. Fráboðast skal eisini um kvinnu, sum er við barn, tá mett verður, at tørvur er á stuðli m.a. orsakað av rúsevnismisnýtslu, sosialum ella sálarligum ávum.
Fráboðanir skulu vendast til barnaverndartænastuna í tínum øki.
